شعبۂ انگریزی

شعبۂ انگریزی
الحمد للہ دار العلوم ندوۃ العلماء نے انگریزی زبان وادب کو اپنے قیام کے وقت سے ہی اپنے نصاب تعلیم میں شامل رکھا ہے، اسی وجہ سے ندوی فضلاء دنیا کے گوشے گوشے میں بحسن وخوبی ملک وملت کا فریضہ ادا کر رہے ہیں، ندوۃ العلماء کی سب سے نمایاں خوبی وقت کے تقاضوں کو بروقت سمجھ کر ان کا حل پیش کرنا ہے، اسی مقصد کے پیش نظر حسب ایماء حضرت مولانا سید محمد رابع حسنی ندوی (ناظم ندوۃ العلماء، لکھنؤ) احاطۂ دار العلوم میں شعبۂ انگریزی کا عمل قیام میں آچکا ہے، اس شعبہ کا باقاعدہ افتتاح بدست حضرت مولانا سید محمد رابع حسنی ندوی مد ظلہ العالی مؤرخہ ۳ ستمبر ۲۰۱۸ء کو کیا گیا، اس شعبہ کے صدر جناب ڈاکٹر محمد اسلم صدیقی صاحب (فرزند مرحوم جناب پروفیسر وصی احمد صدیقی صاحب) ہیں۔
شعبۂ انگریزی کے ذریعہ "یک سالہ انگریزی ڈپلوما" بھی کرایا جا رہا ہے، اس یک سالہ کورس میں ندوہ کے فارغ التحصیل طلبہ کا داخلہ تحریری ٹیسٹ اور انٹرویو کے بعد کیا جاتا ہے، ان طلبہ کے قیام وطعام کا نظم دار العلوم کے ذریعہ کیا جاتا ہے، نیز ہر طالب علم کو ماہانہ تین ہزار روپئے( -/ 3000 ) بطور وظیفہ دیے جاتے ہیں، اس یک سالہ انگریزی ڈپلوما کا مقصد فارغین ندوہ کے اندر انگریزی تحریر وتقریر کی صلاحیت پیدا کرنا ہے، تاکہ ندوی فضلاء ساری دنیا میں اسلام کے ابدی پیغام کو بہتر طریقہ سے پھیلا سکیں۔